Pyetja:

Selam alejkum i rahmetullah
E nderuara redaksi! Po ju drejtohem me një pyetje. Jam një motër muslimane, fal pesë kohët namaz. Meqenëse jam edhe nënë e tre fëmijëve, elhamdulilah, punoj nga ora 8/5. Ndoshta nuk është arsye për lënien e mësimit të shkronjave arabe, mirëpo më intereson ta di a vlen leximi i Kuranit në gjuhën shqipe në këtë muaj të madhërishëm Ramazan dhe sa mund të jetë vlera pasi ai nuk lexohet në gjuhën arabe.
Allahu ju shpërbleftë për punën që po bëni. Selam alejkum!


Përgjigjja:

Alejkum selam ue rahmetullahi ue berekatuhu!

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Allahu të shpërbleftë për kujdesin dhe interesimin që ke ndaj fesë islame.
Nuk ka dyshim se leximi i Kuranit ka shpërblim të madh.

- Transmeton Ibn Mesudi, Allahu qoftë i kënaqur me të, se Pejgamberi salallahu alejhi ue selem ka thënë: “Ai i cili lexon një shkronjë prej librit të Allahut e ka një sevap dhe një sevap shpërblehet dhjetëfish. Nuk po them (ELIF- LAM -MIM) një shkronjë, mirëpo elifi një shkronjë, Lami një shkronjë dhe Mimi një shkronjë.” Tirmidhiu nr. 2910 dhe hadithi është hasen-sahih.
Pra, ai që lexon vetëm këto tri shkronja ka 30 sevape.

- Transmeton Ebu Umame, Allahu qoftë i kënaqur me të, se Pejgamberi salallahu alejhi ue selem ka thënë: “Lexojeni Kuranin sepse ai do të vijë si ndërmjetësues për ata që e lexojnë atë.” (Muslimi nr. 804)
Të gjitha këto mirësi dhe shpërblime i gëzon ai i cili e lexon Kuranin në gjuhën arabe dhe jo ai i cili lexon Kuranin në gjuhë të tjera. Kurse ai i cili lexon Kuranin në gjuhët tjera do të shpërblehet mirëpo nuk do ta arrijë shpërblimin e cekur në hadithet e lartpërmenduara dhe në hadithe të tjera.

Njeriu shpërblehet edhe duke lexuar me përkushtim komentimin e Kuranit dhe përkthimin e tij.