Pyetja:

Kur jam në shkollë, në diasporë, nuk mund ta fal shpesh namazin e drekës, disa herë edhe të ikindisë.
A lejohet sipas Islamit ta fal më vonë një namaz që nuk e kam falur gjatë ditës, për shembull kur të vijë prej shkollës? Nëse po, kur?


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Nuk lejohet të vonohet falja e namazit nga koha e përcaktuar. Allahu i Plotfuqishëm thotë: "Pra shkatërrim është për ata që falen, Të cilët ndaj namazit të tyre janë të pakujdesshëm." (El Maun, 4-5)

Bejhakiu në Sunenin e tij transmeton se Sad ibn ebi Vekasit ka thënë: "E kam
pyetur të Dërguarin e Allahut salallahu alejhi ue selem për fjalën e Allahut: "Të cilët ndaj namazit të tyre janë të pakujdesshëm", i Dërguari (alejhi salatu ve selam) tha: "Janë ata të cilët e vonojnë namazin nga koha e vet." (Këtë hadith Hakimi e bëri të sahih).

Prandaj ju këshillojmë që të keni kujdes dhe mundohuni ta falni namazin në kohën e tij dhe mos neglizhoni në këtë, qoftë edhe nëse i falni vetëm farzet dhe për këtë nuk ju nevojiten vetëm se ca çaste. Gjithashtu, nëse në disa raste specifike nuk arrini ta falni në kohën e përcaktuar, atëherë lejohet ta bashkoni drekën me ikindinë dhe t’i falni së bashku në kohën prej hyrjes së kohës së namazit të drekës deri në fund të kohës së ikindisë. Por duhet ta keni parasysh që këtë mos ta bëni praktikë të vazhduar. Me fjalë të tjera, ju së pari duhet të tentoni t`i falni namazet në kohën e tyre, qoftë në pushimet ndërmjet orëve, së paku farzet. Nëse nuk keni mundësi (edhe pse besoj se nëse e jepni mundin, do ta arrini), atëherë bashkojeni drekën me ikindinë në kohën e drekës apo ikindisë dhe kjo është zgjidhja që mund ta bëni. Allahu e di më së miri!