Pyetja:

Si mund ta falënderoj Zotin, nëse më plotëson ndonjë dëshirë apo ndonjë lutje?


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.
   Falënderimi i Allahut nga ana e besimtarit bëhet në forma dhe mënyra të ndryshme, mirëpo duhet të kemi parasysh një gjë që e harrojnë shumë. Kjo gjë është se mendimi që Allahun duhet ta falënderojmë vetëm atëherë kur na plotësohet ndonjë dëshirë nuk është cilësi e besimtarëve të denjë, por e njerëzve që janë të zbehtë në besim dhe e munafikëve. Allahu i Lartësuar duhet të falënderohet në çdo rast, vend dhe situatë, qoftë e favorshme për ne apo jo. Kjo është kështu për shkak se dhuntitë dhe begatitë që na dhuroi Allahu i Lartësuar janë të shumta. Allahu i Lartësuar thotë: “Dhe Ai ju dha gjithë atë që e kërkuat (që kërkoi nevoja juaj) dhe edhe në qoftë se përpiqeni t'i numëroni të mirat e Allahut nuk do të mund të arrini t'i përkufizoni (në numër). Vërtet, njeriu është i padrejtë dhe shumë përbuzës.” (Ibrahim, 34)
   Më lart përmendëm se falënderimi është në disa forma, nuk është vetëm me fjalë, ashtu si mendojnë disa, por duhet të jetë edhe me vepra. Allahu i Lartësuar i urdhëron Beni Israilët të jenë falënderues edhe në vepra: “Veproni duke falënderuar, o familje e Davudit, por nga robërit e Mi, pak janë mirënjohës.” (Sebe, 13)
   Gjithashtu, falënderimi më i vlefshëm dhe më i shprehur është kur ne zbatojmë urdhrat e Allahut të Lartësuar dhe largohemi nga haramet e Tij. Ky është falënderimi më mirë që do të mund të bënte besimtari ndaj Krijuesit të Tij, kurse të gjitha të tjerat janë të lidhura me mundësinë e besimtarit dhe me dëshirën e tij për të arritur sa më shumë shpërblime.
 

Alaudin Abazi
15.2.2008