Pyetja:

Es-selamu alejkum ue rahmetullahi ue berekatuhu!
Kisha një pyetje: Si është gjykimi i Islamit ndaj personit i cili nuk mund të zbatojë urdhrat e Allahut në rast frike? A arsyetohet ky person?


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.
   Është e vështirë të jepet ndonjë gjykim i përgjithshëm rreth personit të frikësuar se a është i arsyetuar apo jo. Kjo është kështu për shkak se duhet të shikohet se për çfarë frike është fjala dhe çfarë vepre detyrohemi të lëmë nga ajo frikë.
   Kështu që në disa raste njeriut i lejohet në rast frike nga vrasja që ta fshehë besimin e tij ashtu si veproi Amar ibën Jasiri kur e kanë zënë mushrikët e Mekës dhe për të shpëtuar u detyrua ta fshehë besimin e tij. Allahu i Lartësuar thotë: “Ai që pas besimit të tij e mohon Allahun, me përjashtin të atij që dtyrohet (për të mohuar), kurse zemra e tij është e bindur plotësisht me besim, por fjala është për atë që ia hap gjoksin mosbesimit, ata i ka kapur hidhërimi nga Allahu dhe ata kanë një dënim të madh.” (Nahl, 106)
   Pastaj njeriu për shkak të frkës nga zgjerimi i sëmundjes apo vonimi i shërimit lirohet nga disa obligime, si: agjërimi, qëndrimi në këmbë gjatë faljes, etj.. Prandaj themi se çështja e frikës në lënien e disa farzeve nuk është gjithmonë e njëjtë dhe për secilin rast duhet të ketë dispozitë të posaçme. Allahu e di më së miri!

Alaudin Abazi
25.4.2008