Pyetja:

Selam alejkum! Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe të gjithë ata që ndjekin rrugën e tij deri në Ditën e Gjykimit.
Njeriu-individi që ka pasion të lëndojë vetveten apo që dëshiron të përjetojë vuajtjet shpirtërore dhe psikike që një here vetëm i ka përjetuar, dua të di terminologjinë në gjuhën kuranore apo edhe në anglisht, latinisht apo greqisht.
Mbetem me shpresë dhe dëshirë që të më përgjigjeni, Allahu ju shpërbleftë!


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen  e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Nuk kemi njohuri sa i përket termit për të cilin bëni pyetje, por ajo që dimë ne është se ekziston një çrregullim psikik në të cilin njeriu ndien kënaqësi gjatë mundimit dhe lëndimit të vetes. Këtë çrregullim e quajnë Mazokizëm dhe i pari që e përdori këtë term ishte psikologu gjerman dhe eksperti i mjekësisë ligjore dr. Richard von Krafft-Ebing në vitin 1886.

Pasioni për lëndimin dhe dënimin e vetes është element i përhapur edhe në fe dhe tradita të ndryshme që njeh bota, si në budizëm, hinduizëm, etj. Fatkeqësisht edhe në disa sekte dhe grupime islame është i përhapur ky fenomen, si te shiat (rafiditë) dhe te drejtimet e ndryshme sufiste.
  
Nga këndvështrimi islam i pastër, të gjitha format me të cilat dënohet dhe lëndohet njeriu pa nevojë janë të ndaluara. Në Islam trupi i njeriut nuk është pronë individuale e personit, në kuptimin se atij nuk i lejohet t`u nënshtrohet formave të ndryshme me të cilat e mundon dhe i krijon dhimbje trupit pa nevojë. Trupi është i krijuar nga Allahu i Lartësuar dhe është amanet te njeriu, i cili ka përgjegjësi se si kujdeset për të. Allahu e di më së miri!

 

Alaudin Abazi
20.6.2008