Pyetja:

Mundohem t’i fal pesë vaktet e namazit, por ndonjëherë në pamundësi të kohës apo për shkak të udhëtimit mbetem pa falur drekën dhe ikindinë. Si t’ia bëj? Më udhëzoni ju lutem. Nëse është fjala për kaza, më tregoni si bëhet më hollësisht.


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.
   Allahu i Lartësuar ka përcaktuar lehtësime për namazin e udhëtarit dhe ju mund t`i shfrytëzoni këto lehtësime dhe në të njëjtën kohë të mos e falni namazin kaza. Prej këtyre lehtësimeve është shkurtimi i namazeve (farzeve) nga katër rekate në dy rekate, kurse sunetet mund t’i lini pa i falur fare gjatë udhëtimit. Lehtësim tjetër është se ju mund t’i bashkoni namazet, më qartë mund ta bashkoni namazin e drekës me ikindinë dhe t’i falni këto dy namaze së bashku qoftë në kohën e drekës apo të ikindisë, kur të keni mundësi. Gjithashtu, mund ta bashkoni namazin e akshamit me jacinë dhe t`i falni ato në kohën e akshamit apo të jacisë, kur të keni mundësi.
   Kurse në pamundësi të kohës, ju duhet ta keni parasysh se namazi falet kaza vetëm në rast të harresës dhe nëse na ka zënë gjumi, derisa ka kaluar koha. Kurse në raste të tjera duhet të tentoni ta falni namazin në çdo kohë, por nëse koha është shumë e kufizuar, atëherë ju duhet ta falni së paku farzin në kohën e tij. Allahu e di më së miri.
 

Alaudin Abazi
1.2.2008