Pyetja:

Selam alejkum!
Allahu ju shpërbleftë për punën që bëni në rrugën e Tij, por kam një sugjerim/vërejtje. Mos edhe “klubi kulturor” është arenë e përqendruar në filozofi të caktuar të shpjegimeve islame? Sepse shoh që nuk gjej asnjë shkrim të vëllait Avni Tafili, i cili po bën një punë të madhe për thirrjen e të rinjve në Islam këtu në Zvicër, po madje edhe në Kosovë. Thjesht shpreha një shqetësim, jo pse mund të jem prej atyre motrave që me padurim pres shkrimet e tij, por diqysh më duket e padrejtë. Allahu e di më së miri.
Selam alejkum!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Motër e nderuar! Ju përshëndesim me selam dhe ju urojmë mirëseardhjen në faqen tonë. Më pas themi se si gjithmonë do të jemi të hapur në përgjigjen e pyetjeve apo të pikëpyetjeve të ngritura nga ju.

Faqja www.klubikulturor.com është një faqe që është aktive prej më shumë se katër vitesh dhe për të vlerësuar se çfarë metodologjie përcjell apo çfarë filozofie të shpjegimit të Islamit ndjek, është shumë lehtë të kuptohet. Mjafton të shfletoni temat e publikuara në rubrikat e faqes dhe të shihni metodologjinë e shtjellimit dhe të sqarimit të çështjeve dhe të problematikave islame. Prandaj për këtë nuk do të zgjerohemi më shumë, por do t`ju bëjmë me dije se kjo faqe bashkëpunon me një numër jo të vogël hoxhallarësh të diplomuar në universitetet më prestigjioze të botës islame. Numri i këtyre hoxhallarëve tejkalon njëzetëshin, pastaj kemi me dhjetëra bashkëpunëtorë me të cilët këshillohemi rreth mbarëvajtjes së faqes dhe gjërave të tjera.

Ndërsa në lidhje me publikimin e temave, tentojmë që të gjitha materialet që publikohen të jenë tema ekskluzive, të shkruara enkas për faqen www.klubikulturor.com, prandaj për të ruajtur origjinalitetin te ne nuk publikohen tema të huazuara ose të kopjuara nga faqet e tjera, siç vërejmë tek shumë uebfaqe islame. Duke u nisur nga ky fakt, të gjithë të interesuarit, posaçërisht hoxhallarët, janë të mirëseardhur me shkrimet e tyre që dërgojnë në adresë të faqes sonë. Kurse për lexuesit e tjerë të faqes, të cilët dëshirojnë të marrin pjesë aktive me ndonjë temë, përkthim ose ese, kemi hapur një rubrikë të posaçme të quajtur “Faqja Juaj”. Aty publikohen temat të cilat dërgohen nga lexuesit dhe të interesuarit, të cilët dëshirojnë t`i publikojnë punimet e tyre në këtë faqe.

Motër e nderuar, të vlerësohet apo të vihet në pikëpyetje një grup hoxhallarësh dhe kontribuuesish të cilët japin mund sado modest në shërbim të kësaj feje dhe të davetit, vetëm për shkak se në këtë ekip nuk gjendet emri i një personi që ju e njihni ose e preferoni, është një paragjykim naiv, të cilin nuk besojmë që do ta pëlqente edhe vetë personi të cilin ju e përmendni në letrën tuaj. Ne nuk e njohim vëllanë Avni Tafili, por e tëra që dimë për të janë disa tema që shohim të publikuara në disa faqe, me ç`rast ne ushqejmë mendim të mirë për të dhe kujtojmë se me ato shkrime është duke dhënë një kontribut mjaft të mirë, për ç’gjë i urojmë të vazhdojë në këtë edhe më tutje.
Por nuk është në rregull dhe është padrejtësi që ju të gjykoni gjërat, njerëzit dhe institucionet me këtë kriter që keni përmendur në letrën tuaj.

Në fund, kërkojmë mirëkuptim për këtë që thamë dhe lusim Allahun e Lartësuar të na falë ne dhe ju dhe të na bëjë nga ata që e kuptojnë të vërtetën me argumente të qarta e burimore e pastaj e pasojnë atë! Amin!
 

Alaudin Abazi
12.9.2008