Pyetja:

Es-selamu alejkum!
Ju përshëndes dhe ju uroj për ueb faqen, e sidomos për rubrikën "Pyetje-Përgjigje".
Këtu kam arritur të gjej zgjidhjen e shumë dyshimeve që kam pasur, mbasi problemet e secilit prej nesh janë të ngjashme [gati të njëjta].
Kisha disa pyetje rreth namazit.
1. Kur falem në shtëpi, vetëm, pëshpërit gjatë këndimit Kuran [gjatë tërë namazit]. A është keq kjo? (Nuk këndoj Kuran me zë, por nuk jam shumë i qetë).
2. Pasi marr abdest, kam shumë probleme me barkun, me gazrat. Kjo më shtyn të dyshoj rreth abdestit, e vazhdon edhe pasi të hyj në namaz.
Mos vallë kjo do të thotë se nuk e kam nijetin e mirë ose abdestin në rregull, apo është vetëm organizmi i cili e tret ushqimin?
3. Nëse këndoj suret e zakonshme gjatë namazit, si: Felek, Nas, Kader, etj., a duhet të këndohet besmelja pas Fatihasë?
4. Dhe a është i domosdoshëm këndimi i sureve në bazë të renditjes në Kuran?
Allahu ju shpërbleftë për punën që bëni!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

1. Nëse faleni në shtëpi, jeni vetëm dhe nuk pengoni askënd gjatë leximit me pëshpëritje, inshallah nuk ka ndonjë të keqe. Por nëse faleni me xhemat apo është i pranishëm dikush, atëherë nuk bën që t`i pengoni të tjerët.

2. Paragjykimi që ngrini ju është vesves nga shejtani, i cili dëshiron përmes këtyre cytjeve (se nuk e keni nijetin si duhet, etj.) që t’ju dobësojë dhe të ndiheni i preokupuar dhe të mos arrini përqendrimin gjatë kryerjes së adhurimeve. Në disa përgjigje të mëhershme kemi folur për vesveset gjatë kryerjes së adhurimeve, prandaj mund të lexoni ato.

3. Nëse pas Fatihasë këndohen suret nga fillimi (si Feleku, Nas, etj), atëherë fillohen me besmelen. Ndërsa nëse këndojmë ndonjë pjesë nga Kurani, nga mesi apo fundi i sureve (pra jo nga fillimi), atëherë nuk këndohet besmeleja.

4. Gjithashtu nuk është obligative këndimi i sureve sipas radhitjes, pasi vërtetohet se Muhamedi (salallahu alejhi ue selem) me një rast, gjatë namazit, kishte kënduar suren “Nisa” para sures “Ali Imran”, ndërsa surja “Ali Imran” është para sures “Nisa” në radhitjen e Kuranit. Megjithëkëtë është e preferuar që t`i përmbahemi radhitjes. Allahu e di më së miri!