Pyetja:

Selam alejkum! Unë e kam një problem për sa i përket renditjes së safave. Disa nga hoxhallarët thonë se duhet të bashkohen kraharorët, dikush thotë këmbët e dikush thotë gjokset. Unë kam lexuar që shejh Uthejmini, Allahu e mëshiroftë, thotë se “duhet të bashkohen e të rregullohen thembrat e këmbëve”. Cila është e saktë?
Allahu ju shpërbleftë!


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.
   E sakta rreth radhitjes së safave (rreshtave) është puqja e krahëve dhe e këmbëve. Buhariu në koleksionin e tij përmend disa hadithe që kanë të bëjnë me radhitjen e safave dhe e titullon një nënkapitull kështu: “Nënkapitulli rreth ngjitjes së krahut për krah dhe të këmbës për këmbë”.
   Ai përcjell nga Enes Ibën Maliku, se Muhamedi, lavdërimi dhe paqja qofshin mbi të, gjatë rreshtimit para fillimit të namazit thoshte: “Drejtoni safat tuaja se unë ju shoh nga prapa.” Shënon Buhariu dhe Muslimi.
   Ndërsa Enesi, Allahu qoftë i kënaqur me të, ka thënë: “Ne i ngjitnim krahët dhe këmbët me njëri-tjetrin”, e këtu qëllimi është për puqjen e tyre gjatë radhitjes së safave. Këtë e vërtetojnë edhe shokët e Muhamedit, lavdërimi dhe paqja qofshin mbi të, të cilët e përshkruajnë mënyrën e radhitjes së safave, si Abdullah Ibën Abasi, Numan Ibën Beshiri dhe të tjerë. Allahu e di më së miri!
 

Alaudin Abazi
23.5.2008