Pyetja:

Selamu alejkum! Allahu ju shpërbleftë për përgjigjet tuaja. Kam një numër pyetjesh që i kam shënuar dhe që kërkoj përgjigje, por këtë dëshiroj ta bëj në faqen tuaj, pasi te ju gjej përgjigjen më të mirë dhe më të kënaqshme. Nëse je vonuar në namazin e sabahut dhe në momentin që je zgjuar, pikërisht në atë kohë, ka filluar të lindë dielli, a ta fal a po jo namazin në atë moment? Dhe nëse zgjohesh pasi ka lindur dielli, a të marr abdest po në atë kohë prapë, kur më ka dalë gjumi? E nëse jo, atëherë cila është koha më e preferueshme për të falur namazin kaza të sabahut? Ma cekni një orë ju lutem për takvimin aktual dhe kam dëshirë të di se a marr gjynah se më ka ikur ky namaz në rastin që e përmenda?


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen  e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

   Muhamedi, lavdërimi dhe paqja e Allahut qofshin mbi të, në një hadith thotë: “Kush fle në kohën e namazit apo e harron atë, le ta falë në atë moment që t`i kujtohet dhe nuk ka ndonjë kompensim (shpagim) tjetër vetëm se këtë.” Shënon Buhariu, Muslimi dhe të tjerët.

   Ky hadith shumë qartë tregon se çfarë duhet të veprojë muslimani nëse i kalon ndonjë kohë e namazit pa falur për ndonjë shkak të arsyetuar, sikurse harresa apo kur e merr gjumi dhe nuk arrin të zgjohet në kohën e përcaktuar. Ky namaz falet menjëherë pasi t`i kujtohet apo në atë moment që i del gjumi. Prandaj në faljen e namazeve farze nuk shikohen kohën e ndaluara të faljes sikurse momentet e lindjes së diellit, kur është dielli në zenit apo perëndimi i diellit. Duke pasur parasysh këtë, themi se nëse ju ndodh të zgjoheni në momentin kur dielli është duke lindur, atëherë duhet menjëherë të ngriheni dhe ta falni namazin, edhe pse dielli është duke lindur.

   Jemi duke punuar një temë që ka të bëjë me namazin në kohët e ndaluara gjatë ditës dhe shpresojmë se së shpejti do ta përfundojmë dhe aty do të sqarojmë më gjerësisht çështjet që kanë të bëjnë me këtë problematikë. Allahu e di më së miri!

 

Alaudin Abazi
20.6.2008