Pyetja:

Selam alejkum!
Allahu xh.sh. ju shpërbleftë për punën e palodhur që bëni. Desha t’ju parashtroj një pyetje: A prishet abdesti nëse femra muslimane përshëndet me dorë (kontakt) mashkullin e panjohur dhe e kundërta?


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.
   Nëse femra muslimane përshëndet me dorë ndonjë mashkull të huaj apo prekja në përgjithësi e femrës a e prish abdestin apo jo është nga gjërat për të cilat ka mospajtim te fukahatë.

1. Medhhebi shafi dhe hanbeli shohin se e prish abdestin nëse ndodh prekja direkt pa ndonjë mbrojtës, si doreza, etj. Hanbelitë kanë kushtëzuar që prekja të ndodhë me epsh. Për këtë argumentojnë me ajetin kuranor:
“O ju që besuat! Kur doni të ngriheni për të falur namazin, lani fytyrat tuaja dhe duart tuaja deri në bërryla; fërkoni kokat tuaja, e këmbët lani deri në dy zogjtë. Nëse jeni xhunubë, atëherë pastrohuni (lahuni)! Në qoftë se jeni të sëmurë, ose në ndonjë udhëtim, ose ndonjëri prej jush vjen prej vendit të nevojës, ose i keni prekur gratë dhe nuk gjeni ujë, atëherë mësyjeni (merrni tejemum) dheun e pastër dhe me të fërkoni fytyrat dhe duart tuaja.” (Maide, 6). Ata kanë thënë se në këtë ajet nënkuptohet se nëse preket gruaja, atëherë prishet abdesti.

2. Mendimi i medhhebit hanefi dhe maliki është se prekja nuk e prish abdestin dhe kanë thënë se ajeti me të cilin kanë argumentuar ata që kanë thënë të kundërtën nuk është argumentim i saktë, pasi prekja e cila përmendet në këtë ajet është përdorim metonimik (përdorim i një fjale në vend të një tjetre) dhe prekja këtu ka për qëllim kontaktin seksual. Kështu komentohet ky ajet nga komentuesit e Kuranit si Ibën Abasi dhe të tjerë.

   Prandaj mendimi i saktë është se vetëm prekja dhe përshëndetja me dorë e femrës së huaj nuk e prish abdestin. Ky është mendim i përzgjedhur nga shumë ulema, por duhet ta kemi parasysh se nëse thuhet se prekja me dorë e femrës së huaj respektivisht e burrit të huaj nuk e prish abdestin, kjo nuk nënkupton se lejohet përshëndetja. Kjo është e ndaluar dhe për këtë kemi folur në një nga përgjigjet e mëhershme. Allahu e di më së miri!
 

Alaudin Abazi
18.4.2008