Pyetja:

Es-selamu alejkum ue rametullahi ue berekatuhu!
Allahu ju shpërbleftë për ketë punë që po bëni!
Edhe pse ju keni dhënë shumë përgjigje në lidhje me namazin, prapë më duhet t’ju pyes konkretisht për mosfaljen me kohë të namazit.
Unë jam e punësuar dhe e kam të vështirë praktikimin e faljes së namazeve me kohë, ju lutem më jepni përgjigje nëse ka mundësi. A mund t’i bashkoj namazet e drekës dhe ikindisë në kohën kur të shkoj nga puna në shtëpi dhe në çfarë forme kam të drejtë t’i fal, nëse po?


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Falja e namazeve në kohën e përcaktuar është një nga kushtet themelore për pranimin e namazit. Allahu i Lartësuar thotë: “...Namazi, është detyrë e obligueshme për besimtarë në kohë të caktuar.” (Nisa, 103). Duke u nisur nga ky fakt, ju këshillojmë që t`i falni namazet në kohët e tyre dhe të mos i bashkoni ato pa ndonjë arsye të saktë. Ndoshta është e mundur që vështirësia apo pengesa me të cilin ballafaqoheni në punë të jetë e tejkalueshme, posaçërisht pasi ju mund ta falni vetëm farzin dhe në këtë rast koha e duhur nuk është më shumë se ca minuta. Prandaj, edhe një herë themi se nëse keni mundësinë t`i tejkaloni ato vështirësi, atëherë mos ngurroni qoftë edhe nëse për këtë ballafaqoheni me diçka të padëshiruar dhe të papëlqyeshme. Allahu i Lartësuar thotë: “...e kush u përmbahet dispozitave të Allahut, atij Ai i hap rrugë.” (Talak, 2)

Pasi sqaruam këtë pikë të rëndësishme, themi se nëse e gjeni veten në situatën në të cilën i keni provuar të gjitha mundësitë dhe jeni në gjendje që nuk arrini gjithmonë të praktikoni faljen në punë në kohën e përcaktuar, atëherë lejohet gjatë këtyre rasteve ta bashkoni namazin e drekës dhe ta falni në kohën e namazit të ikindisë. Por nuk është e drejtë që ju ta bëni këtë praktikë të përhershme dhe ta bëni esencë këtë në praktikën tuaj, por duhet gjithmonë ta shfrytëzoni mundësinë ose më mirë të themi të krijoni mundësinë që ta falni namazin në kohën e duhur. Allahu e di më së miri!