Pyetja:

Es-selamu alejkum!
A ka “ulje teverruk” në namazin e vitrit nëse falet më shume se një rekat?


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen  e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Së pari, për të qenë e kuptueshme pyetja për lexuesit, do të sqarojmë domethënien e “teverrukut”, pastaj do të sqarojmë dispozitën përkatëse. Prej sunetit të Muhamedit salallahu alejhi ue selem gjatë uljes në teshehudet e namazit vërtetohet se ulja bëhet në dy forma:

1. Ulja në gjunjë, është mënyra e njohur se si ulen gjatë teshehudit falësit në përgjithësi, kjo mënyrë në gjuhën arabe quhet “xhelsetu iftirash”.

2. Ulja teverruk, gishtat e këmbës së djathtë drejtohen nga kibla, ndërsa këmba e majtë futet nën këmbën e djathtë, do të thotë nuk ulemi mbi këmbën e majtë. Kjo formë e uljes gjatë teshehudit te ne praktikohet kryesisht nga femrat.

Të dyja këto forma të uljes gjatë teshehudit janë të vërtetuara nga i Dërguari, lavdërimi dhe paqja qofshin mbi të, por secila formë ka vendin e përcaktuar se kur të veprohet ulja e parë dhe kur të veprohet ulja e dytë. Ulja e parë (ulja në gjunjë) është sunet të praktikohet gjatë teshehudit të parë në të gjitha namazet, ndërsa me ulje teverruk është sunet të ulemi gjatë teshehudit të dytë. Më konkretisht, ulja teverruk është sunet të praktikohet në teshehudin e dytë të namazit të drekës, ikindisë, akshamit dhe të jacisë (farzeve), kurse në të gjitha teshehudet e tjera sunet është të ulemi në gjunjë.

Gjithashtu edhe në namazin e vitrit është sunet të mos ulemi me ulje teverruk, por të ulemi në gjunjë për faktin se namazi i vitrit nuk falet me më shumë se një teshehud, por edhe nëse ulemi, atëherë bëhet ndarja në mes rekateve të vitrit me selam. Pra, falim dy rekate të vitrit, ulemi në teshehud dhe japim selam, pastaj ngrihemi dhe falim edhe një rekat të veçantë dhe ulemi në teshehud dhe japim selam. Edhe në teshehudin e parë edhe në teshehudin e dytë të vitrit ulemi në gjunjë, pasi janë të ndara me selam. Allahu e di më së miri!

Alaudin Abazi
20.6.2008