Pyetja:

A është e obliguar një vajzë dymbëdhjetëvjeçare të agjërojë? Unë i fal pesë kohët e namazit dhe nëse nuk të lënë prindërit, çfarë të bëj? A bën të agjëroj pa ngrënë syfyr, por duke ngrënë në orën 12 të natës? Allahu ju shpërbleftë!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Në lidhje me kohën se kur obligohet të agjërojë njeriu, mashkull qoftë apo femër, nuk është esenciale mosha, por pjekuria. Nëse femra ka arritur moshën e pjekurisë (pubertetin), atëherë obligohet të falet dhe të agjërojë. Shenjat e pubertetit te femrat janë njëra nga këto:
1. Ejakulimi, nëse ndodh në gjumë apo e zgjuar.
2. Dalja e qimeve në pjesët e turpshme dhe në sqetulla.
3. Paraqitja e menstruacioneve.

Në lidhje me moshën se në cilën vit ndodh pjekuria te femrat, themi se ne përgjithësi dallon: te disa arrihet më herët, kur mbushin nëntë vjeç, te disa arrihet më vonë, por fukahatë theksojnë se koha më e vonuar te femrat mund të jetë mosha 12-13 vjeçare.

Duke pasur këtë parasysh, themi se nëse ju keni arritur moshën e pjekurisë, atëherë obligoheni të agjëroni.
Ndërsa rreth problemit me prindërit, do t’ju kishim sugjeruar që të tentoni t`i bindni ata, por nëse nuk arrini, atëherë veproni brenda mundësive, qoftë edhe me mënyrën të cilin e përmendni në pyetjen tuaj. Allahu e di më së miri!

 

Alaudin Abazi
5.9.2008