Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Së pari, ju urojmë mirëseardhje dhe ju përgëzojmë për rrugën që keni zgjedhur. Vërtet besimtari gëzohet kur dëgjon për të rinjtë dhe të rejat që i kthehen Krijuesit të tyre, me gjithë kohën në të cilën jetojmë, ku format e joshjeve, të kënaqësive, të emancipimeve, të mashtrimeve të kësaj bote kanë arritur kulmin. Ajo që na shtyn të gëzohemi edhe më shumë dhe që fut në zemrat tona shkëndijën e shpresës për një të ardhme më të mirë janë rastet jo shumë të rralla ku këta të rinj në fillim nuk gjejnë përkrahjen nga më të afërmit e tyre në rrugën që kanë zgjedhur, por megjithëkëtë ata arrijnë t`i përballojnë të gjitha këto sfida dhe i bindin familjet e tyre, se kjo është zgjedhja e tyre dhe më në fund e tërë kjo rezulton edhe me pranimin e tyre ashtu si janë.

Në këtë vend më duhet të bëj një vërejtje, se familjet ose prindërit të cilët kundërshtojnë zgjedhjen e fëmijëve të tyre pa dyshim u dëshirojnë atyre të mirën e aq më pak që ata të kenë dëshirë që atyre t`u ndodhë diçka e keqe. Por koha në të cilën ata janë zhvilluar, duke i absorbuar të gjitha shpifjet që i visheshin Islamit, pastaj edhe propaganda e furishme e cila është duke u bërë në kohën tonë, të gjitha këto i bëjnë ata të kenë paragjykime dhe neveri rreth mësimeve islame në përgjithësi. Prandaj një qasje e qëlluar nga ne si fëmijë të tyre duke ua treguar realitetin e Islamit së pari me sjellje, pastaj me gjërat e tjera, i bën ata ta ndryshojnë qëndrimin që kanë ndaj Islamit.
Kurse sa i përket problemit tuaj konkret, fillimisht nuk kuptuam moshën tuaj, por, si duket, nga ajo që keni shkruar, jeni e re, prandaj do t’ju këshillonim të mos nxitoni në hapat që do të ndërmerrni. Refuzimi i prindërve tuaj që të martoheni me djalin që është duke ju kërkuar, ndoshta është me vend, pasi ju ende jeni e re dhe situata që përjetoni me prindërit (do të thotë në përkufizimin që ata ju bëjnë) ju bën të mos keni mundësi t`i peshoni gjërat ashtu si duhet, prandaj mendojmë se do të ishte me vend që në këtë kohë t`i dëgjoni prindërit.

Kjo nuk do të thotë që ju t`i dëgjoni ata edhe në mospraktikimn e mësimeve islame, por në këtë duhet të jeni më e vendosur, më e arsyeshme dhe të mundoheni të gjeni forma dhe metoda që do t`i bëjnë prindërit tuaj ta pranojnë formën e jetesës që keni zgjedhur. Prandaj, le të jetë gjëja e parë që ju do të ndryshoni në vetën tuaj (para se të ndryshoni dukjen) sjellja me ta; respektojini ata, ndihmojini në gjërat që kanë nevojë, mundohuni të bëni vepra që ata do t`i pëlqejnë, mos ua ktheni fjalën, bisedoni me ta ëmbël, dëgjojini ata në gjërat të cilat nuk kundërshtojnë ligjet e Allahut. Të jeni e bindur se të gjitha këto do të ndikojnë që edhe ata të ndryshojnë raportin me ty dhe do të të respektojnë ashtu si i respektoni edhe ju.

Gjithashtu, nuk ju rekomandojmë të mbani ose të vazhdoni kontaktin me njerëz të huaj, më konkretisht me djalin që përmendni se ju kërkon. Ngritja e raporteve të hershme do t’ju krijojë probleme në jetë, për shkak se dashuria e cila vjen para se të maten disa gjëra do t`ju shkaktojë shqetësime, të cilat ndoshta edhe do t`i përjetoni tërë jetën. Prandaj në Islam kushtëzohet që para se të ngrihet dashuria ndërmjet një mashkulli dhe femre duhet të shikohen shumë rrethana, kështu që ajo dashuri të arrijë realizimin e mundësive të bëhet e përjetshme.

Në fund, mos harroni mbështetjen tek Allahu i Lartësuar, në Dorën e të Cilit është çdo gjë, për çdo problem, preokupim, mërzi kthehuni Atij dhe padyshim Allahu i do ata që i përulen Atij dhe e zgjedhin Atë për mbështetës!