Pyetja:

I Dërguari i Allahut alejhi selam na ka lajmëruar se imani pakësohet dhe dobësohet siç dobësohet rroba në trup, por cila është rruga e përtëritjes dhe e forcimit të imanit?


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.
Imani është gjëja më e shtrenjtë që ka njeriu. Imani është ai i cili i ndan njerëzit mes banorëve të xhenetit dhe atyre të xhehenemit. Thotë Allahu i Madhëruar: “A mos është ai që ishte besimtar, sikurse ai që ishte jashtë rrugës? Jo! Këta nuk janë të barabartë.” (Sexhde, 18)
Allahu ua ka bërë haram imanin disa të afërmve të Pejgamberëve, si p.sh. babait të Ibrahimit, xhaxhait të të Dërguarit të fundit, njërit prej bijve të Nuhut, edhe pse ata ishin të afërm të Pejgamberëve, prandaj besimtar i nderuar falënderoje Allahun për këtë begati të madhe që të ka dhënë. Sikur të mos ishte udhëzimi i Allahut, ne nuk do të ishim të udhëzuar, andaj si të kujdesemi për këtë dhuratë të madhe, dhuratën e imanit, që të mos dobësohet dhe të mos pakësohet?
Prej asaj që është e njohur në Islam është se imani shtohet dhe pakësohet. E, nuk shtohet imani me diçka më shumë se me vepra të mira. I Dërguari i Allahut ulet në mesin e shokëve të tij dhe thotë: “Kush prej jush sot është ngritur agjërueshëm?” Ebu Bekri tha: “Unë, o i Dërguari i Allahut.” I Dërguari i Allahut tha: “Kush prej jush ka vizituar një të sëmurë sot?” Ebu Bekri i tha: “Unë, o i Dërguari i Allahut.” Tha i Dërguari i Allahut: “Kush prej jush ka ushqyer një të varfër?” Ebu Bekri tha: “Unë, o i Dërguari i Allahut.” Tha i Dërguari i Allahut: “Kush prej jush sot ka përcjellë një xhenaze?” Ebu Bekri tha: “Unë, o i Dërguari i Allahut.” Atëherë i Dërguari i Allahut tha: “Nuk bashkohen këto gjëra te një njeri përveçse do të hyjë në xhenet.” (Muslimi nga Ebu Hurejra)
Paramendo këtë varg veprash të mira brenda një dite, pastaj mos u habit kur dëgjon fjalën e të Dërguarit të Allahut: “Imani i Ebu Bekrit peshon sa imani i gjithë këtij umeti.”
Që të përtërish imanin tënd, ta shtosh atë dhe të ngrihesh me të, lexoje Kuranin dhe medito për ajetet e tij. Nuk ka ndonjë dhikër më të madh se fjala e tij dhe nuk mund të lutesh më shumë sesa përmes fjalëve të tij.
Lexo tregime dhe ngjarje të Pejgamberëve, që të shohësh madhështinë e imanit të tyre. Ja miku i Allahut, Ibrahimi, i cili dëshiron të flijojë birin e vet, trupin e vet para zjarrit, ushqimin e vet për musafirë, zemrën e tij, të gjitha këto vetëm për hir të Allahut. Me këto gjëra ai arriti një fitore të madhe, një ngritje të lartë, saqë mori epitetin “miku i Allahut”. Thotë Allahu: “All-llahu e zgjodhi Ibrahimin të dashurin më të ngushtë.” (Nisa, 125)
Leximi i historisë së tyre dhe meditimi në jetën e tyre shton imanin tënd, forcon bindjen tënde. A nuk sheh në fjalën e Allahut që i drejtohet të Dërguarit të Tij: “Ata (të Dërguarit e përmendur) ishin që All-llahu i vuri në rrugë të drejtë, andaj ti merri shembull në udhëzim." (Enam, 90)
Për të shtuar imanin tënd vizitoji varrezat, mendo se si ata në anën e jashtme duken të barabartë, ndërsa brenda nuk janë të barabartë. O Allah, sa nga njerëzit e mirë në varreza thërrasin: “O Zot, shpejtoje ndodhin e kiametit, ndërsa afër tyre ka nga njerëzit e këqij, të cilët thërrasin: “O Zot, mos e bëj kiametin për shkak të trishtimit që ka dhe të asaj se çka do ta presë pas kiametit.”
 

Përktheu: Shaban Murati
24.8.2007