Pyetja:

Es-selamu alejkum ue rahmetullahi ue berekatuhu!
Kohëve të fundit po përballemi edhe me disa spektakle televizive të organizuara, ku marrin pjesë disa njerëz të ashtuquajtur iluzionistë (fjalë moderne për magjistarë, fallxhorë), të cilët bëjnë shfaqje spektakolare te një popull musliman dhe njerëzit i shikojnë ata. Pyetja ka të bëjë se meqenëse jetoj në një familje të paudhëzuar ku nuk praktikohet Islami, shpesh më rastis që të jem në një dhomë ku familja i përcjell këto "shfaqje". Pyetje ime është, meqenëse ata e bëjnë punën e tyre si e bëjnë, a më lejohet mua si musliman, besimtar, i nënshtruar Allahut, të qëndroj dhe t’i përcjell këto programe apo të largohem nga dhoma? Pra, a ka të bëjë kjo diçka me akiden (besimin)?
Ues-selamu alejkum!



Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.
Prej Allahut kërkojmë mbrojte nga ajo që e ka goditur këtë umet dhe e lusim Atë të na mbrojë nga dënimi i Tij, por jo duke bërë dua dhe të rrimë duarkryq, por të punojmë në përmirësimin e kësaj gjendjeje katostrofale, sepse Allahu nëse dënon, atëherë aty e godet edhe të mirin afër të keqit, edhe pse kur të ringjallen secili do të shpërblehet sipas nijetit të tij. Por ajo që na mundon ne është përjetimi i dënimit bashkë me zullumqarin. Thotë Allahu subhanehu ue teala në një citat kuranor: “Ruajuni nga e keqja (nga dënimi) që nuk godet vetëm ata që bënë mizori prej jush (por edhe të mirët) dhe ta dini se Allahu është ndëshkues i rreptë.” (Enfal 25)
Ajo që shfaqet në programet televizive pa dyshim është e qëllimtë vëlla, kështu që për ty mbeten dy gjëra.
E para, ti ndalosh nga ajo e keqe sipas mundësisë që ke, nëse e sheh se ke mundësi ta fikësh televizorin dhe t’i këshillosh, ajo është metoda më e mirë.
E dyta, të largohesh nga ajo dhomë dhe të mendosh për ndonjë formë që ndikon në ndalimin e tyre nga ai krim dhe assesi nuk të lejohet të rrish me ta në përcjelljen e asaj shfaqjeje të ndyrë. Allahu e di më së miri.

Fatmir Raçi
28.9.2007