Pyetja:

Es-selamu alejkum ue rahmetull-llahi ue berekatuhu!
E lexova përgjigjen tuaj në lidhje me pyetjen se si të përqendrohemi në namaz. Rregullisht i lexoj pyetjet tuaja dhe sinqerisht më kanë ndihmuar shumë dhe janë shumë mirë të argumentuara. Allahu ju shpërbleftë!
Pata një pyetje. Resulullahu salallahu alejhi ue selem në një hadith ka thënë se është një shejtan me emrin Hanzeb, i cili i pengon besimtarit në përqendrim në namaz, duke ua kujtuar këtë dhe atë. Prandaj, Resulullahu salallahu alejhi ue selem na ka porositur që të themi “Eudhu bil-lahi min hanzeb” dhe të pështyjmë tri herë në të majtë.
Pyetja ime është: A duhet ta bëjmë këtë dua para se të fillojë namazi apo në namaz?
D.m.th., nëse je duke kënduar Fatihanë dhe vëren ngacmime, a bën të thuash “Eudhu bilahi min hanzeb” dhe të pështysh në të majtë dhe të vazhdosh namazin?
Ues-selamu alejkum!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.
Fillimisht, vëlla i nderuar, të falënderoj për përzgjedhjen e kësaj webfaqeje në prani të shume webfaqeve islame dhe e lusim Allahun Fuqiplotë që të jetë kjo punë argument për ne e jo kundër nesh Ditën e Gjykimit. Amin!
Ajo për të cilën keni pyetur ju, vëlla i nderuar, është e saktë, sepse hadithi gjendet në Sahih Muslim, të cilin e transmeton Othman in ebi Elaasi, hadithi nr. 174405, ku thotë i Dërguari salallahu alejhi ue selem: “... ai është shejtani i quajtur Hanzeb. Dhe nëse vëren nga ai diçka në namaz (të ngacmon), atëherë kërko mbrojtje nga Allahu subhanehu ue teala dhe pështyj tri herë në të majtë.” Thotë transmetuesi: “Veprova ashtu dhe e largoi Allahu atë nga unë.”
Kjo lutje bëhet gjatë namazit, nëse ke ngacmim nga shejtani i mallkuar, por jo të përsëritet shumë herë (siç ndodh nga disa vëllezër, të cilët janë sprovuar me sëmundjen e vesvesit. Allahu ua largoftë vesveset të gjithë muslimanëve!), në mënyrë që mos t’i pengosh ata që falen afër teje.
Vërejtje: Pështyma le të jetë e lehtë, në mënyrë që të mos dëgjohet shumë.
Allahu e di më së miri.

Fatmir Raçi
14.9.2007