Pyetja:

Kam parë një njeri që kur e kreu faljen e namazit (pasi tha selam) i ngriti duar lart dhe po lutej, e pastaj bëri tri sexhde, duke thënë “Allahu ekber” dhe vazhdoi duke thënë “Subuhun Kudusun Rabul melaiketi ue Ruh” Unë e pyeta se më interesoi e ai më tregoi se pas përfundimit të namazit e falenderoj Allahun me përulje me sexhde, duke thënë edhe “Subuhun Kudusun Rabul melaiketi ue Ruh”. Mua më intereson se a lejohet kjo sipas rregullave të namazit? Allahu ju shpërbleftë!

Përgjigja:

Falenderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Veprat të cilat i ka bërë personi që e keni parë, nuk janë të njohura si rite (adhurime) që kërkohen apo preferohen të bëhen pas namazeve. Prandaj, pasi nuk ka argument për to, atëherë ato nuk janë të lejuara dhe vazhdimi në praktikimin e atyre veprave në formë të tillë na dërgon në risi (bidat), për shkak se jemi duke futur një praktikë të re në adhurimin tonë që nuk ka qenë e njohur në kohën e Resulullahut (salallahu alejhi ue selem).

Nëse dikush mund të thotë se çfarë të keqe ka në atë që njeriu të bëjë sexhde dhe lutje, themi se për çdo formë të adhurimit jemi të obliguar të kemi argumentin dhe neve nuk na lejohet të themi se kjo duhet apo është e preferuar të praktikohet në këtë formë dhe në këtë kohë, vetëm atëherë kur kemi argument për të. Dhe po të duhej të bëhej kjo praktikë në këtë formë kështu, atëherë Resulullahu (salallahu alejhi ue selem) do të ishte nga të parët që do ta praktikonte atë.

Alaudin Abazi