Pyetja:

Eselamu alejkum! Allahu ju shpërbleftë për punën  që po e bëni! Më tregoni se a duhet ta ruajmë të vdekurin? Nëse jo, mundësisht një argument.

Përgjigja:

Falënderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Pyetja e juaj nuk është aq e qartë, por me sa kuptojmë, juve e keni për qëllim kur njeriu vdes në mbrëmje ose afër mbrëmjes dhe nuk arrihet të varroset po në atë ditë, atëherë pritet deri në ditën e nesërme. Gjatë mbrëmjes është një bindje ose më mirë të themi një mendim se i vdekuri nuk është mirë të lihet vetëm në dhomë, por duhet të ruhet dhe duhet të qëndrojë gjatë kësaj kohe dikush me të, qoftë një person ose disa, deri në agim.

Kjo nuk është e vërtetë dhe nuk është e nevojshme e aq më pak të jetë e detyruar, qëndrimi i njerëzve në dhomë për të ruajtur të vdekurin. Argumenti për këtë është se nuk posedojmë ndonjë argument që e detyron një gjë të tillë dhe në Islam për të vërtetuar ndonjë dispozitë se është e detyruar ose e preferuar, duhet të bazohet me argumente si citati kuranor, hadithi, ixhmaja, etj. Kurse për të vërtetuar një dispozitë se nuk qëndron, argumenti i saj është mosekzistimi ose mos gjetja e argumentit që e përligj atë dispozitë. Allahu e di më së miri.

Alaudin Abazi

18.03.2007